ជាកម្មវិធីសាកល្បងដែលមានរយៈពេល​ពីរឆ្នាំ ដែលត្រូវបានបង្កើតឡើង ដោយអនុលោមទៅតាម​ជំពូកទី 133 នៃក្រមឆ្នាំ 2016 វាគឺជាច្បាប់សកល ជាកម្មវិធីគណនីយឧបត្ថម្ភប្រាក់ទុនសន្សំ ដែលបានរៀបចំដើម្បីជួយដល់កុមារ និងគ្រួសារនៅរដ្ឋម៉ាសាឈូសេតដែលមាន​ប្រាក់​ចំណូល​ទាប ឲ្យមានលទ្ធភាពអាចសន្សំប្រាក់សម្រាប់ការអប់រំ និងការ​បណ្តុះបណ្តាល​ក្រោយ​រៀនចប់​នៅវិទ្យាល័យ ។ គម្រោងផ្តួចផ្តើមនេះ បានទទួល​មូលនិធិឧបត្ថម្ភតាមរយៈភាពជាដៃគូរវាងវិស័យសាធារណៈ និងឯកជន នឹងជួយដាក់ទុនសន្សំបង្គ្រប់ ព្រមទាំងហិរញ្ញវត្ថុចំពោះកម្មវិធីសិក្សា ។ គណនីសន្សំផែនការ 529 ទាំងអស់នេះ ដែលជារបស់មហាវិទ្យាល័យ នឹងត្រូវ​ផ្តល់ជូនតាមរយៈការិយាល័យ​រតនាគារ និងអគ្គលេខាធិកាផ្នែកទទួលថវិកានៃរដ្ឋម៉ាសាឈូសេត (Office of the Massachusetts State Treasurer and Receiver General) ក្នុងកិច្ចសហប្រតិបត្តិការ​ជាមួយនឹងអាជ្ញាធរ​ហិរញ្ញវត្ថុនៃរដ្ឋម៉ាសាឈូសេត  (MEFA-Massachusetts Educational Financing Authority) និង Inversant ។

កម្មវិធី SoarMA សម្រាប់សាកល្បង​នៅសហគមន៍ គឺជាកម្មវិធី “ជុំទី II” របស់អ្នកចូលរួមនៅរដ្ឋម៉ាសាឈូសេត ដែលចូលរួមក្នុងកម្មវិធីមូលនិធិប្រឈមការងារទីក្រុង របស់ទុនបម្រុងសហព័ន្ធ (Federal Reserve’s Working Cities Challenge grant program) ។ ទីក្រុងទាំងនោះមានដូចជា ក្រុងហាវើហ៊ិល (Haverhill) ឡូវ៉ែល (Lowell) ភិតហ្វៀល (Pittsfield) ស្ព្រិងហ្វៀល (Springfield) និងវ៉ឆេស្ទឹ (Worcester) ។

បំណងរបស់ SoarMA គឺដើម្បីជួយដល់សិស្សនៅរដ្ឋម៉ាសាឈូសេត ព្រមទាំងគ្រួសាររបស់ពួកគេ ឲ្យអាចសន្សំប្រាក់​សម្រាប់​ការសិក្សា​នៅឧត្តមសិក្សា បណ្តុះទស្សនៈវិជ្ជមានចំពោះការ​សន្សំប្រាក់ ការបង្កើតអត្តសញ្ញាណ ប័ណ្ណសន្យានៅតាមសហគមន៍ដែលមាន​ប្រាក់​ចំណូល​ទាប និងរៀនជំនាញសំខាន់ៗផ្នែកហិរញ្ញវត្ថុ ។

កម្មវិធី SoarMA នឹង​ប្តេជ្ញាក្នុងការចាត់ចែងធនធានរបស់ខ្លួនសម្រាប់ជ្រោមជ្រែងគោលបំណងទាំងបីជាគោលការណ៍ ។ ទីមួយ កម្មវិធីនេះ មានបំណងបង្កើនភាគរយ​នៃការសន្សំប្រាក់ជាគ្រួសារ សម្រាប់ការអប់រំនៅឧត្តមសិក្សា នៅតាមសហគមន៍ជាគោលដៅទាំងអស់ ។ ទីពីរ កម្មវិធីនេះមានបំណងផ្តល់ជូនកម្មវិធី​ការ​អប់រំហិរញ្ញវត្ថុដែលមានគុណភាពខ្ពស់ដល់គ្រួសារ ដើម្បីបង្កើតបានជាវប្បធម៌ចំពោះការសន្សំប្រាក់ដើម្បីអនាគត និងការគ្រប់គ្រងថវិកាប្រកបដោយនិរន្តរភាព ។ ទីបី កម្មវិធីនេះមានបំណងជម្រុញឲ្យសិស្សចុះឈ្មោះចូលរៀនឲ្យបានច្រើន​ក្រោយចប់វិទ្យាល័យ និងអត្រាបញ្ចប់ការសិក្សាមានកម្រិតខ្ពស់ ចំពោះទីក្រុងទាំងអស់នេះ បង្កការលើកទឹកចិត្តសម្រាប់ការសិក្សានៅឧត្តមសិក្សាចំពោះកុមារដែលងាយរងគ្រោះខាងផ្នែកសេដ្ឋកិច្ច និងកុមារដែលមិនមាន​ឱកាស​គ្រប់គ្រាន់ ។

គណនីយទាំងអស់ដែលមានផ្តល់ជូនតាមរយៈកម្មវិធី SoarMA គឺជា “ផែនការ 529” ដែលជាផែនការវិនិយោគចំណេញពន្ធ ដែលអនុញ្ញាតដោយវគ្គទី 529 នៃក្រមប្រាក់ចំណូល​ផ្ទៃក្នុង (Internal Revenue Code) ហើយត្រូវបាន​រៀបចំឡើង ដើម្បីជម្រុញឲ្យមានការសន្សំប្រាក់​សម្រាប់​ការ​សិក្សានៅឧត្តមសិក្សា ។ គណនីយទាំងអស់នេះ មានការផ្តល់ជូនជាពិសេស​តាមរយៈ EMFA’s U.Fund ដែលឧបត្តម្ភដោយកុម៉ុងវែលនៃរដ្ឋម៉ាសាឈូសេត (Commonwealth of Massachusetts) ហើយគ្រប់គ្រងដោយក្រុមវិនិយោគហ្វ៊ិឌែលិធី (Fidelity Investments) ។

គណនីយទាំងអស់ដែល​បង្កើតឡើង​តាមរយៈកម្មវិធី SoarMA មានរួមបញ្ចូលការដាក់ប្រាក់ដំកល់ចំនួន $50 ដើម្បីជួយដល់គ្រួសារឲ្យចាប់ផ្តើមដាក់ប្រាក់សន្សំ​សម្រាប់ភាពជោគជ័យនាពេលអនាគត ។ ការទទួលបានប្រាក់ចំណូលក្នុងគណនីយដែលមិនបាច់​បង់ពន្ធ ហើយអ្នកអាចដកប្រាក់សន្សំនោះយកមកប្រើទៅតាមគោលបំណងដោយមិនចំាបាច់ត្រូវបង់ពន្ធសហព័ន្ធ និងរដ្ឋលើពន្ធប្រាក់ចំណូល ឡើយ ។ ការចូលរួមចំពោះគណនីយនេះ គឺជាអ្វីដែលមិនចំាបាច់កាត់ពន្ធ ហើយក៏មិនត្រូវបង់ថ្លៃសេវាកម្មថែរក្សាគណនីយនេះឡើយ ។ គណនីយនីមួយៗ អាចមានប្រាក់ជាអតិបរមាចំនួន $375,000 សម្រាប់អ្នកទទួលផលម្នាក់ៗ ។

កម្មវិធីនេះ គឺបើកចំហចំពោះសិស្សថ្នាក់ទីប្រាំពីរទាំងអស់ ដែលបានចុះឈ្មោះចូលរៀននៅអនុវិទ្យាល័យដូចខាងក្រោម ដែលចាប់ផ្តើមក្នុងឆ្នាំសិក្សា 2017-2018 ៖

• នៅទីក្រុង Haverhill ៖ អនុវិទ្យាល័យ Consentino Middle School
• នៅទីក្រុង Lowell ៖ អនុវិទ្យាល័យ Stoklosa Middle School
• នៅទីក្រុង Pittsfield ៖ អនុវិទ្យាល័យ Reid Middle School
• នៅទីក្រុង Springfield ៖ អនុវិទ្យាល័យ South End Middle School
• នៅទីក្រុង Worcester ៖ អនុវិទ្យាល័យ Worcester East Middle School